El livro, yamado “Ofisios”, es el dodjen livro del autor Asher Amado, enjiniero, nasido en Israel, ijo de una famiya sefaradita, orijinaria de Edirne (Turkiya).

Asher Amado deskrive en su livro varyos ofisios ke eran en el pasado una parte integral de la vida kotidyana, komo el saka (aguador), el lechero, el gazedji, el buzadji, el aguzador de kuchiyos, el vendedor de malebi, el panadero, i mas.

De la otra parte, ofisios aktuales komo el vendedor de telefones selulares, aktivador de “drones”, enjinier elektroniko, teknisien de telefones selulares, aktivador de grua, etc.

El livro “Ofisios”, eskrito por Asher Amado, es un lavor orijinal, kontemporaneo; una kreasion de eksperiensia, kon una “aroma” del pasado i del prezente.

En este livro se topan, deskripsiones de ofisios desde la ekspulsion de los judios de Espania i Portugal en 1492 asta la aktualidad.

Segun dize Asher Amado, “El livro es una halka mas en una kadena de larga data, ke su buto es salvaguadrar la erensia kultural del ladino; una lucha ke mos akompanya fidelmente mas de 500 anyos, i es una fuente de inspirasion para la kreatividad de las profesiones del futuro”.